Han ti ve phong ila, keini kristian mizo thalai phailam a awm tan chuan kar khatah vawikhat chiah Biak In-a kalna hun kan nei a. Kan inkhawmna hun leh member dangte nena inhmuhna hun kan neih ve theih hunte a tlem hle mai. A lan danah chuan he kan hun tlem leh reilote chung na na na hi chu bawhpelh loh hram duh teuh awm tak kan ni hlawm a. Amaherawh chu, inti teh ang, inkhawm hi member tam ai hian kan tlem tlat thin, chumai nilovin inkhawm chhun thin te pawh kan phurna a tlem tual tualin kan tlem hret hret ni in a lang.
Hnam dang zing/ram danga awm kan ni a, thlarau nun pawh a tho lo hle thin in ka hria. Ka lo hmuh leh thlir ve dan mai mai chuan, tu huatthu ni suh se, han in ti hnum a, thlarau nun han intichak leh tu tur hi kan awm chuang biklo riau te hian ka hmu thin. Hyderabad-a ka chhuk tirh lam phei kha chuan phur em em in ka’n va inkhawm ve thin a, amaherawh chu ka phurna te chu a reh tial tial a, kan han awm rei leh deuhva, chakna pakhatmah hi ka nei tawh lo, ti ila ka sawisual awm love. Engatinge niang aw? Eng hian nge min mawlh a, min ti phur lo ta em em tu tih pawh hriat thiam a har thin hle. Han ti dawt ila, tumah insawi chhan chuang lovin, a ro a ni tawp mai. Keimah kha ka ro zawk pawh chu a ni ngei ang. Mahse, hmun danga ka awm ve thinna-ah pawh hetiang em hi chu ka ni ngai bik lova sin le. Kan phur reng e chu ka ti thei lo, mahse, inkhawm chak ngawih ngawih chung pawh a hostel atanga kan chhuah theih loh chang lah a tam. Hetah mahni duh leh duh lovah a in nghat tawh a, hostel dan te’n min phuar tawh lova, mahse ‘engvangin nge ka phur tak meuh lohva inkhawmte ka lo thulh tak fo aw’ tih te ka in zawt fo thin.
Thil chi hrang hrang min zir tir a lo ni reng a. Ringtu tan chuan phur lai chauhva inkhawm tur kan ni lo. Tih hram hram nun neih te a lo pawimawh zia te min hriat chhuah tir a. Mihring ve mai nih hi chuan chauh change chu kan nei ngei ang. Ka thianpa pakhat thu min hrilh hi dik ka ti em em, “You are closer to God ... when you realize you need Him". Tichuan, ka inkhawm nachhan hi midang vang em ni lo ni a, ‘midang nun a hmuh tur kan neih loh vang mai a inkhawm te thulh tur ka lo nih aw’, tih te min hriat chhuah tir zawk a. Kohhran chu intichak tawn tur chu kan ni ngei mai, amaherawh chu midang nun atang chauhva intuai thar kan tum chuan kan ti fuh lo fo ngei ang. Midang nun thlir hmasa lova mahni zawk in en fo hi a pawimawh a ni tih te min ngaihtuah chhuah tir a. Ka thlarau nun chawm tur chuan keimah ngei pawhin ka thawh ve a ngai a, phur loh lai pawh a tih hram hram a, keimah leh Pathian inkar atan chauh pawhin inkhawm te kal thin ila ka hlawkpui zawk ngei ang. Chutichuan ‘keimah leh Pathian’ inkar a that chuan midangte pawhin ka nunah ei tur an lo nei dawn zawk a lo ni.
